ప్రియ / నీ కోసం 2

_____________

నీతో కలిసీ, వెలుగు నీడల సంగమ స్థలిలో
భానుడి స్పర్శ కై ఆరాటపడే పూల సౌందర్యాన్ని చూడాలని
ఆకుల అంచున మెరిసే మంచు ధాన్యాలను ఏరుకోవాలని

ఆహా !..ఏం లేదూ !
అలా కాఫీ తాగుతూ మౌనంగా

తూర్పుకొండలమద్య దోబూచులాడే దినకరుడికి
రారమ్మని చిరునవ్వుతో స్వాగతం పలకాలని

ఇక సాయం సంధ్యలో

ప్రేయశి బుగ్గల సిగ్గుతో ఎర్రబారిన సూరీడికి
మళ్ళీ రేపోస్తావు కదా అంటూ అల్లరిగా వీడ్కోలు చెప్పాలని

నింగీ నేలా తాకే ముని మాపు వేళలో

సంధ్య చీకట్లు ముసిరే వేళ జలతారు వెన్నెలలో తడుస్తూ
నీ కళ్ళలో నా నవ్వుల వెలుగులు చూసుకోవాలని

అలా కాసేపు ఊరికే
ఇద్దరు మనుషులు
అచ్చంగా ఇద్ద్దరు మనుషులు
మాట్లాడుకున్నట్టు రికామీగా నాలుగు మాటలు

జీవితం గురించి
గమనం గురించి
గమ్యం గురించి
నువ్వు చెప్తుంటే వినాలని

స్నేహం గురించి
ప్రేమ గురించి
బంధం గురించి
నీతో వాదించి గెలవాలని

నీ పక్కనే కాసేపు కూర్చోవాలని
నా బోలెడు కలలు నీ దోసిట్లో పోయాలని
ఇలా ఇంకా ఏవేవో ..
నాకు తెలుసు
ఇది ఎప్పటికీ పూర్తి కాని కవితని
అయినా రాస్తూనే ఉంటా
నీ కోసం......................