నీకోక లేఖ

ప్రియ కారుమంచి / నీకోక లేఖ ..
......................................
ఎలా ఉన్నావు అని అడిగావు నువ్వు

ఏం చెప్పనూ ....!!

పెద్దగా మార్పుమీ లేదు

తడి తడి నేలతో ముచ్చట్లు
నగ్నపాదాలు పచ్చికతో ఆడే దోబూచులాటలు
అపురూపంగా దోసిట్లో నింపుకున్న విరజాజులు
వేళ్ళ సందుల నుంచి జారిపోతుంటే,
దిగులుగా వెనక్కు వెనక్కు చూసాను వాటి కోసమూ
ఆ వంకతో వీడ్కోలైనా చెప్పకుండా వెళ్ళిపోతున్న నీకోసం

నీ జ్ఞాపకాలు
జాజి పరిమళంలా నన్ను మత్తెక్కిస్తూనే ఉంటాయి
ఇప్పటీకీ ఎప్పటికీనూ.......................

ఆరోజు నువ్వు ఇచ్చి వెళ్లిన ఖడ్గపు మెరుపు
చీకటిలో చిరుదివ్వెలా ఇంకా దారి చూపుతూనే ఉంది.

అప్పుడు మన ముచ్చట్లు విని మురిసిన జంట తరువుల నీడ
ఇప్పుడు మౌనంగా నిట్టూర్చే నన్ను చూసి వెక్కిరిస్తుంది .

మరి నువ్వు అడుగుతావు ఇక
నువ్వు ఎలా ఉన్నావూ అని

ఏం చెప్పగలను నేను
పెద్దగా మార్పేమీ లేదని తప్ప...