~నీ కోసం ~

~నీ కోసం ~

ఇంకా విడిపోని
చీకటి పరదాలు చీల్చుకుని
వేకువ వే వేల వర్ణాల పూదోట మీదగా 
నీగుండే సవ్వడి మోసుకొస్తూ
అలలా తాకిన 'ఓ ' ఆలాపన

ఫిల్టర్ కాఫీ పరిమళాలతో
నీ మాటల మాధుర్యం కలిసి
మనసుని మత్తెక్కిస్తూ
సీతాకోక చిలక రెక్కలను స్ప్రుజి౦చిన
తెమ్మెర సిగ్గుని గానం చేస్తూ ఓ కోయిల సందేశం

నీ నవ్వుల గలగలలు
మన కలల ఊసులూ కలిసి
రాత్రి చంద్రుని వెన్నెల మరకలుగా, సరిగమలుగా మారి
నా యెదలో మువ్వలు కట్టి సందడి చేస్తున్నాయి

ప్రపంచాన్నంతా ఒక పక్కకి జరిపేసి
నువ్వూ నేనూ ఒక అంచున కూర్చుని మాట్లాడుకుంటున్నట్టూ
దృశ్యాలన్నీ అదృశ్యమైపోయి
మనమే ఏకైక దృశ్యంగా మిగిలినట్లూ అనిపిస్తుంది .....

లోకంలో పరిమళాలన్నీ రెండు పూలలో ఇమిడి పోతే
ఆ పూలలోకి నువ్వూ నేను నడిచెళ్ళినట్లనిపిస్తుంది..

మనం ఎవరి నుంచి ఎవరం, ఏమీ కోరుకోలేదని తెలిసీ
ఈ సృష్టి మనతో స్నేహం కోరుకున్నట్లుగా ఉంది ......

______ప్రియ కారుమంచి ....